Minggu, 25 Oktober 2020
Sastra & Humor
Fikmin

Fragmén Hujan

Selasa, 10 Maret 2020

MONGKLÉNG saparat langit. Peuting nu moal panggih jeung bulan. Sab hujan geus miheulaan. Kembang-kembang murungkut katirisan. Conchita keur ngalangeu, lebah jandéla kamar lanté opat rumah susunna. Dibaturan ku Si Frédo, ucing hideung kameumeutna. Resep nyérangkeun tingkah paripolah sabudeureunana. Tuan Sanchéz, tukang batu antik nu pangheulana ngonci panto tokona. Saged dijas hujan. Kolot nu tarapti. Gudang inuman lebah péngkolan keur dijaga pulisi. Cenah ngajual barang ilégal. Tuan Garcia nu bogana, geus dicerek. Bonganna korét. Kapireng Nyonya Alonso, nu sohor létahna seukeut lir congo pedang, nyeuleuweung. "Fernando...! Di mana silaing! Dasar teu gableg pikir!" Teu weléh curiga salakina salingkuh jeung Arantxa, parawan kolot, anak tukang sendal jeung sapatu loak. Conchita nyikikik, rét ka nu keur ngaréngkol bari diharudum sepré. Ngaguher. Manéhna, nu jolna sok ngeteyep, nété tarajé beusi, pipireun rumah susun.*

Budi Mugia Raspati - kisuta.com


KATA KUNCI

BAGIKAN

BERI KOMENTAR