Senin, 18 Januari 2021
Sastra & Humor
Sajak

Jurdin Du Luxembourg

Minggu, 7 Agustus 2016

naon makna simpé pikeun kuring
jeung anjeun, wanoja nu rambutna pirang
ngarumbay, nu leumpang ngagidig ka tonggoh
mangku anjing jalu kawas nangkeup orok?


lebah régang-régang tangkal nu hideung
nu taya daunan; salosin manuk gagak camani
eunteup di dinya. Harita jarum jam maju ka magrib
dipirig girimis jeung hiuk angin usum tiris.


di béh dituna aya ogé japati laut sajodo
ngojayan balong nu méh beku
jiga gumpalan és dina jero kulkas.


wanoja, naon makna simpé pikeun anjeun
seug hirup nyorangan ukur dibaturan
ku anjing jalu? Langit sarupa cai isikan béas


1999


Soni Farid Maulana - kisuta.com


BAGIKAN

BERI KOMENTAR