Dunya Hayal

“Apa, amengan yu?” Ceuk Sarah, bari ngarawél HP, nu karék deuk trét pisan ngetik status. “Amengan naon atuh, Geulis?” Teu weléh matak haté tingtrim, ningali sorot panona. “Dunya Hayal…” Pokna téh. Torolang, Sarah ngajéntrékeun naon lalakon bapana. “Hah? Apa janten reungit?” Ceuleukeuteuk, Sarah seuri bungah ningali bapana olohok téh. “Reungit nu tara nyoco!” Bari ngajembélan pipi bapana. Teu kungsi lila, torojol Ihsan. Lanceukna. Jibrug. “Halaaah…! Aa, éta kunaon meni baraseuh kitu?” Rada hariwang ningali budak rancucut. “Nembé gelut jeung beunteur di solokan!” Tuluy ka cai bebersih. Mandi. Kuring mésem, reueus pacampur, hirup di keluarga Dunya Hayal…* Apoedy Sarah Ihsan-kisuta.com