Pantun Geter (Bubuka)

TRUNGTRENG! Trungtreng! Geter kacapi galuntreng!
Ki Juru Pantun sila mendeko. Ngajentrengkeun kacapi buhun. Seja Medar Lampah Sang Geter.
“Ahung..! Ahung..! Ahung..! Ahung guru limana putik, lembah dempak lembah dampit, lembah cikal lembah bakal, nu nyangga sarangka kujang..!
Ahung.! Ahung..! Ahung..! Ahungna ka buyut bukung, buyut bukung uang aung, di tengah caléntrang hérang, mata wéné beureum konéng.
Lang! Sinulang nyeréngkébéng, asal nyusup bulu kurung, asal nu mabak Pakuan, ahung paralun..!
Raga kuring ukur geter, sukma kuring ogè geter.
Bumi langit tina geter, Lauh mahfudz sami geter.
Geter kahiji cahaya, geter kadua suara.
Katilu rupa jeung warna, kaopatna mah aroma.
Geter ngawujud dimensi, ngalaras nyari harmoni
Dimensi hiji, jadi luang. Dimensi dua, kalangkang.
Pami tilu jadi rohang, kaopat mah teu kasawang.
Nini geter! Aki Geter! Ulah sageter-geterna! Ulah sageter-geterna!
Panggeterkeun angen kuring, mangka hatè tetep èling.
Geter nyangsang na hanjuang, geter teuleum di handeuleum.
Geter datang mawa bèja, geter lunta mawa hanca.”
Trungtreng! Trungtreng! Geter kacapi galuntreng!* Helmi Pakudjati-kisuta.com