Jagal Bandung

PANAS poe ereng-erengan. Mungprung ti Ujungberung lempeng ka kulonkeun. Alun-alun Bandung nu dituju. Niat rek beubeulian sakalian ngabuburit. Sup motor asup ka tempat parkir handapeun taman alun-alun nu paburantak matak rungseb nempona. Memeh kukulunuan ka unggal toko, kuring nyimpang heula ka Masjid Raya Bandung nu sarua paburantak jeung gareuleuh. Lebah tetecean rek turun ka tempat wudu, kuring rada pasered-sered jeung jelema nu gede awakna. Beungeutna perenges pikagimireun batur. Sirahna dibengker lawon hideung nu aya gambar tangkorakan. Baju kaos hideung rada kuleuheu potongan leungeun semet siku. Kuring ngelehan, sieun dumeh nempo tato dina leungeun katuhuna tulisan "Jagal.., lebah leungeun kencana tulian "Bandung." Wah, preman yeuh. Antukna patutur-tutur ka tempat wudu. Kuring panasaran ka eta jelema. Ditempokeun, manehna muka baju, rek mandi jigana mah. Breh tatona panjang ti leungeun katuhu, nyambung kana dada, terus nepi ka leungeun kenca. Cakakak kuring seuri sorangan bari rada ditahan oge. Horeng tatona teh tulisan "Jagalah Kebersihan Kota Bandung". Kehed teh, kasebelan pisan.* Ruhak Pajajaran-kisuta.com