Jampé

Réngsé tamu nu ka 217, nyésa lalaki duaan. Geus Katempo tina pameunteu duana nu rumek, moal salah, urusan nyeri haté ku awéwé.
"Popotongan abdi badé aya nu ngalamar Mbah.." ceuk jang Jojo Johari.
"Abdi ditolak cinta Mbah, tulungan abdi..." ceuk jang Azie Nasruloh.
Kuring neuteup leleb ka duanana. Deudeuh teuing.
"Heueuh! Kaharti. Mbah aya jampé, kudu dibaca bada solat, tuluy tiupkeun kana cai sa-muk gedé, tuluy caina diinum, Insya Alloh wareg.
Kieu jampé-na :
Nun Gusti, pami leres anjeunna téh jodo abdi, caketkeun !
Tapi pami sanés jodo abdi, caketkeun !
Pami anjeunna teu ngajodo ka abdi,jodokeun !
Pami anjeunna sanés jodo abdi,
ulah dugi anjeunna kénging jodo salian ti abdi..
Pami anjeunna teu tiasa dijodokeun ka abdi,
ulah dugi ka anjeunna kenging jodo nu sanés,
antepkeun supados anjeunna teu kenging jodo jiga abdi
Pami anjeunna tos teu gaduh jodo,
jodokeun deui abdi sareng anjeunna
Pami anjeunna jodo nu sanes,
pegatkeun, jodokeun sareng abdi
Pami anjeunna tetep janten jodona nu sanés,
tepangkeun nu sanes eta sareng jodo nu sanés,
teras jodokeun deui anjeunna ka abdi.* Is Tuning - kisuta.com