Eureun Ngaroko

Murid: "Pa Guru, kumaha carana miceun kabiasaan ngaroko?”
Guru: "Gampang pisan eta mah, jiga malikkeun talapak leungeun, Jang..."
Murid: "Oh, kitu Pa. Kumaha tah carana?"
Guru: "Maneh kudu jangji rek nurut kana naon nu disarankeun ku Bapa. Mun satuju, ke ku Bapa dibere resepna."
Murid: "Muhun lah, Pa."
Guru: "Kieu. Mun maneh keur nyepeng roko, waktu eta roko geus deukeut kana biwir maneh, gancang balikkeun supaya eta seuneu roko nyanghareup kana biwir. Kucara kitu maneh bakal inget yen maneh moal deui-deui ngaroko."
Sababaraha poe ti harita ....
Murid: "Wah Pa Guru, ayeuna abdi tos liren ngaroko teh. Leres pisan eta resep ti Bapa mujarab. Sapertos malikkeun talapak leungeun."
Guru: "Syukurlah!"
Murid: "Tapi Pa Guru, abdi bade izin moal sakola ayeuna. Margi biwir abdi tarutung kasundut seuneu roko, da bongan ngarokona tibalik wae....."
Guru: "Naaaaaa....ari maneh???!!!.."* Irman Dimyatie - kisuta.com