Jampé Nyandung

Asihan aing si leugeut teureup, si tetel si amuratel
Ka dieu siah sing deukeut, aing hayang adek antel
Asihan aing geutah nangka, tongtolang ti dayeuh Bandung
Daratang nu hayang didua, burudul nu hayang dicandung
Ngan sakitu. Teu kurang kecap, teu leuwih ungkara. Ieu jangjawokan kahot, paméré ti bapa kolot. Geus molotok na babatok, ngan tara dibucat-bacot. Kakara di lapak ieu munggaran dipedar, sugan moal jadi camal.
Hé Jalu! Ilo sing lanyah. Teundeun na hurikna ati. Tapelkeun na belangna bayah. Geusan sampeureun pakéeun mangsa hayang rucah motah.
Peupeujeuh tong dicutat-catet bisi kapanggih ku patih goah. Inggis bisi jadi matak, ngaruntagkeun rumah tangga. Kahadé tong dicuam-caém bisi kakupingeun bidadari.
Wanoja bakal marotah. Randa ogé tingjérété. Rabul muru ngepung, ngarawélan haté talangké. Meupeus keuyang! Nyakaran kahayang nu ngolépat na ingetan.* Abu Ainun - kisuta.com