Kaleungitan

MANG Kabayan datang ka kantor pulisi.Lapor kaleungitan.
“Naon nu leungit, Mang?” pulisi nanya.
“Eta, Pa Pulisi, sila kaopat Pancasila “Kerakyatan yang dipimpin oleh hikmah kebijaksanaan dalam permusyawaratan perwakilan,” jawab Mang Kabayan lancar.
“Leungit di mana?” pulisi kerung.
“Di gedong DPR/MPR.”
“Naha leungit di dinya?”
“Apan di dinya, diganti ku popotingan.”
Leos Mang Kabayan pulang, torojol Kang Lamsijan.
“Laporan kaleungitan deuih?” ceuk pulisi nu cikeneh narima Mang Kabayan.
“Sumuhun, Bapa,” Kang Lamsijan rada mangsar-mingsir.
“Naon nu leungit?”
“Sila kadua Pancasila, Bapa...”
“Baruk? Di mana?” pulisi kerung.
“Di tempat razia PKL, Bapa. Tadi petugas najong bujur abdi. Jaba dagangan diburak-barik...”
Pulisi garo-garo teu ateul bari ngutruk.
“Wah, wah, kaya kieu mah boa, kabeh sila Pancasila leungit.”*

Usep Romli Abdul Hamid - kisuta.com