Tungtung Taun

Unggal puteran mangsa
réngkak teu kendat ngawiletan rénghap
sadami
sadami
wanci mingkin deukeut ka lastari

Ti taun ka taun umur tuluy muguran
daun-daun poé ngalakay kabawa angin
Ngabarak
Katincakan
Kaléngkahan
Kapopohokeun
Dahan bulan pasoléngkrah
jadi pangpung kahirupan
Bangkarakna béak dikorowotan rinyuh jaman nu mingkin mahabu

Ari urang beut kadalon-dalon
Haben ngagimbung teu puguh cabak
handapeun tangkal nu geus méh paéh

Inda Nugraha Hidayat – kisuta.com