Samagaha

Samagaha, Kaulanun.
Ieu jisim katambias
Ngatog dina mongkléngna peteng.
Gupay-gapay. Mapay cahaya Salira.
Ukur belis jeung barayana nu rajeg sapanjang jalan.
Ragég
nanawarkeun ééndah peuting
nu ririaban dina saban seuseukeut rindat.

Merebot nu awong-awongan ti suhunan masigit,
kasilep ku haréwos halon biwir alkohol nu ambucuy baseuh.

Hibar salira, Kaulanun, duka nyumput di mana.
Ukur gupay panghiap
nu pating gurilap tina awak-awak bulucun
nu andekak dina kongkolak.

Ieu soca, Kaulanun, beueus ku kakeueung.
Lamur.
Teu awas maca lemah tincakeun.

Inda Nugraha Hidayat - kisuta.com