Sirah

KURING rék nyaritakeun sirah sorangan. Duka kumaha mimitina, ieu sirah ngadadak ngaleutikan. Unggal menit. Unggal jam. Unggal poé. Unggal minggu. Unggal bulan. Ka dokter mah sidik. Unggal poé ganti dokter. Kabéh boboléh. Aya nu gideug. Aya nu nyengkatkeun taktakna. Aya nu langsung balaka teu sanggup. Sedengkeun sirah beuki ngaleutikan. Nepi ka hiji titik. Enya, sirah kuring sagedé titik huruf Arial 12 dina layar 14 inci. Anéhna, sangkilang sirah ngaleutikan, ari nu napel mah angger. Panon. Irung. Biwir. Ceuli. Teu robah. Éra ku kaayaan. Tungtungna mesen topéng ka ahlina. Ngaborong topéng saloba-lobana. Unggal waktu ganti topéng. Sakapeung maké topéng Mario Teguh. Kalan-kalan modél Ki Joko Bodo. Mindeng ditopéng Adi Bing Slamet. Osok ogé ditopéng Éyang Subur. Ka dieunakeun sirah téh ngagedéan deui. Sari-sari rék balik sabihari. Geuwat ka dokter. Ménta sangkan ulah ngagedéan. Hayang angger leutik. Sagedé titik huruf Arial 12. Da éta sirah nu normal keur kuring mah.*

Rudi Riadi - kisuta.com